Үндэсний Дата Төв

Цахим мэдээллийн аюулгүй байдлын “MNSEC 2016” уулзалт, өдөрлөг зохион байгуулагдлаа.

Цахим мэдээллийн хэрэглээ, ашиглалт өдөр ирэх тусам нэмэгдэхийн хэрээр хэрэглэгчдэд санаатай болон санамсаргүйгээр хор хохирол учирсаар байгаа билээ. Үүнийг дагаад цахим мэдээллийн аюулгүй байдлыг хангах хэрэгцээ шаардлага нэн чухалд тооцогдож байна. Цахим мэдээллийн аюулгүй байдлыг хангахад чадвартай боловсон хүчин, хууль эрх зүйн тогтвортой орчин, техник хангамж, тоног төхөөрөмжийн иж бүрэн шийдэл голлох үүргийг гүйцэтгэх хэдий ч хувьсан хөгжиж буй цахим технологи, хэрэглээнд нийцүүлэн өөрчлөгдөн хөгжих нь нэн шаардлагатай юм.

Иймд цахим мэдээллийн аюулгүй байдлын чиглэлээр Олон Улсын болон дотоодын мэргэжилтнүүдтэй мэдээлэл, мэдлэг чадвараа солилцох, арга туршлагаа хуваалцах зорилгоор зохион байгуулагддаг “MNSEC 2016” уулзалт, өдөрлөгийг төрийн болон хувийн байгууллагийн мэдээлэл технологийн мэргэжилтнүүд болон мэдээллийн технологийн мэргэжлээр суралцдаг оюутнуудыг хамруулан 2016 оны 09 дүгээр сарын 28,29 –ний өдрүүдэд “The Corporate Hotel & Convention Centre”-ын “Event Hall”-д 3 дахь удаагаа амжилттай зохион байгууллаа.

“MNSEC-2016” арга хэмжээнд нийт 7 орны 17 илтгэгч оролцсон бөгөөд дараах илтгэлүүдийг танилцуулав.

“Утасгүй сүлжээний эмзэг байдал ба түүний эрсдэлүүд” -Аюулгүй байдлын судлаач О.Энхбат,
“Монголын интернэтийн хэрэглээ” -Судлаач Г.Чинзориг,
“Monetizing malware - a case study” -АНУ-ын цахим аюулгүй байдлын судалгааны баг “Team Cymru”-ын мэргэжилтэн Jacomo Piccolini,
“Cyber espionage in Asia and Mongolia” -Palo Alto Networks компанийн халдлагын шинжилгээний “Unit 42” багийн шинжээч Vicky Ray,
“Collaboration as the key to keep a nation safe” -Швейцари улсын цахим халдлагад хариу үзүүлэх баг болох “SWITCH-CERT”-ийн аюулгүй байдлын мэргэжилтэн Michael Hausding
“Increasing security incident response capabilities in the Asia Pacific region” -Ази номхон далайн бүсийн сүлжээний мэдээллийн төв APNIC-ын аюулгүй байдлын мэргэжилтэн Adli Wahid.
“Threat telemetry from the perspective of FortiGuard labs” -Цахим аюулгүй байдлын чиглэлээр үйл ажиллагаа явуулагч Fortinet компанийн аюулгүй байдлын мэргэжилтэн Gavin Chow.
“Asruex malware and sinkhole” -Япон улсын цахим халдлагад хариу үзүүлэх баг JPCERT/CC-ын халдлага шинжээч Shinichi Horata.

Мөн “MNSEC-2016” арга хэмжээний үеэр олон нийтэд мэдээллийн аюулгүй байдлын талаарх үнэн зөв, бодитой ойлголт, мэдлэгийг бий болгох, төлөвшүүлэх, түгээн дэлгэрүүлэх зорилгоор зохион байгуулагддаг Цахим аюулгүй байдлын “Харуул занги 2016 ” тэмцээний эцсийн шат явагдаж аваргаа тодруулсан бол Open Source log management, Metasploit сэдвээр Аюулгүй байдал судлаач Ц.Ганболд, “Үндэсний дата төв” УТҮГ –ын Систем, өгөгдлийн сангийн админ М.Батмөнх нар сургалт, мэдээлэл хийлээ.

Ерөнхий ивээн тэтгэгчээр “Тридум” ХХК, зохион байгуулагчаар “Цахим аюулгүй байдлын мэдээлэл удирдлагын төв" ТББ (MNCERT/CC), “Үндэсний Дата Төв” УТҮГ тус тус ажиллалаа.